Sağlam həyat tərzinin ayrılmaz hissəsinə çevrilən qulançar təkcə ləzzətli dadı ilə deyil, zəngin qida dəyəri ilə də diqqət çəkir.
E-saglam.az bildirir ki, lif, antioksidant və vitaminlərlə dolu olan bu tərəvəz bədəni həm daxildən, həm də ümumi sağlamlıq baxımından gücləndirir – immun sistemini möhkəmləndirir, həzmi tənzimləyir və reproduktiv sağlamlığı dəstəkləyir.
Az kalorili, yüksək lifli
Qulançarın hər fincanında cəmi 27 kalori və təxminən 3 qram pəhriz lifi var. Bu da onu arıqlamaq istəyənlər üçün ideal edir. Lif toxluq hissini artırır, artıq yeməyin qarşısını alır və bağırsaqların hərəkətini tənzimləyir. Mütəxəssislər onu qaynadılmış yumurta və ya qızardılmış tofu ilə birlikdə yeməyi tövsiyə edirlər.
Təbii sidikqovucu təsir
Qulançar diuretik xüsusiyyətə malikdir, yəni bədəndəki artıq maye və duzun atılmasına kömək edir. Bu təsir həm də sidik yollarını təmizləyərək UTİ (sidik yolları infeksiyası) riskini azalda bilər.
Antioksidantlarla zəngin
Xüsusilə bənövşəyi növlərindəki antosiyaninlər sayəsində qulançar güclü antioksidant təsirə malikdir. Oksidləşdirici stressi azaldır, immun sistemini gücləndirir və ürək xəstəliyi ilə bəzi xərçəng növlərinə qarşı qoruyucu rol oynayır.
E vitamini ilə hüceyrə qorunması
Qulançarda E vitamini var ki, bu da hüceyrələri sərbəst radikallardan qoruyur. E vitamininin orqanizmdə daha yaxşı mənimsənilməsi üçün qulançarı zeytun yağı kimi sağlam yağlarla birlikdə istehlak etmək tövsiyə olunur.
Reproduktiv sağlamlığa dəstək
Təbii birləşmə olan protodioscin hormon balansını qoruyur və cinsi funksiyaların yaxşılaşmasına kömək edə bilər. Bu səbəbdən qulançar həm qadın, həm də kişi sağlamlığı üçün faydalı hesab olunur.
Bağırsaq florasını gücləndirir
Qulançar prebiyotik xüsusiyyətli inulin maddəsi ilə bağırsaqlarda faydalı bakteriyaların artmasına şərait yaradır. Bu da qəbizlik və şişkinlik kimi həzm problemlərini yüngülləşdirməyə yardım edir.
Folat mənbəyidir
B9 vitamini (folat) ilə zəngin olan qulançar hüceyrə böyüməsini və DNT sintezini dəstəkləyir. Hamiləlik zamanı dölün beyin və onurğa beyni inkişafında mühüm rol oynayır.
Sümük sağlamlığını qoruyur
Bir fincan qulançar K vitamini baxımından olduqca zəngindir. Bu vitamin sümük sıxlığını artırır və osteoporoz riskini azaltmağa kömək edir – xüsusilə yaşlı insanlar üçün əhəmiyyətlidir.
Əhval-ruhiyyəni yaxşılaşdırır
Qulançar serotonin və dopamin istehsalında rol oynayan fol turşusu ilə zəngindir. Bu xüsusiyyət ona psixoloji sağlamlıq baxımından da əhəmiyyətli yer qazandırır. Tədqiqatlar folat çatışmazlığı ilə depressiya arasında əlaqə olduğunu göstərir.
Necə istehlak etməli?
Qulançarı buxarda, qrildə, qızardaraq və ya şorbalarda istifadə etmək mümkündür. Vitamin itkisinin qarşısını almaq üçün yüngül bişirmə üsulları və sağlam yağlarla birlikdə istehlak tövsiyə olunur.
Tərcümə: Könül Oruc
