Boyun ölçüsünün sağlamlıq risklərini üzə çıxara biləcəyi məlum olub.
E-saglam.az xəbər verir ki, həkimlərin sözlərinə görə, qalın boyun təkcə estetik məsələ deyil, həm də ciddi xəstəliklərin gizli göstəricisidir. Bədən kütlə indeksi bəzən yanıltıcı olsa da, boyun çevrəsi daha dəqiq nəticə verir.
Araşdırmalara əsasən, qalın boyun hipertoniya, atrial fibrilasiya, ürək çatışmazlığı, koronar ürək xəstəliyi, tip 2 diabet və obstruktiv yuxu apnesi ilə əlaqələndirilir. Hətta hamiləlik diabetinin yaranma ehtimalını da artırır.
Risk hədləri dəqiq müəyyən edilib. Kişilərdə boyun ölçüsü 43 santimetrdən, qadınlarda isə 35,5 santimetrdən yuxarı olduqda təhlükə artır. Bundan sonra hər santimetr boyun çevrəsi ölüm və xəstəxanaya düşmə ehtimalını yüksəldir.
Mütəxəssislərin fikrincə, bu vəziyyətin səbəbi üst bədən yağlarının qan dövranına turşular buraxmasıdır. Nəticədə xolesterol, şəkər və ürək ritmi pozulur. Bu yağların daxili orqanların ətrafında toplanan visseral piylərlə birbaşa əlaqəsi var.
Həkimlər bildirirlər ki, sadə bir lent ölçüsü ilə boyun çevrəsini yoxlamaqla riskləri vaxtında görmək mümkündür. Bununla yanaşı, sağlam qidalanma, müntəzəm idman və keyfiyyətli yuxu boyun ölçüsünü azaltmağa kömək edir.
Tərcümə: Könül Oruc
