Dermatoloq Dr. Özlem Yılmaz Albayrak bildirib ki, yay mövsümündən sonra bir çox insanda dəri ləkələri daha aydın görünməyə başlayır.
E-saglam.az xəbər verir ki, onun sözlərinə görə, günəşin zərərli təsirləri, genetik meyllər və hormonal dəyişikliklər dəriyə ciddi təsir göstərir və müxtəlif tipli ləkələrin yaranmasına səbəb ola bilər. Dərinin özünü qorumaq üçün daha çox “melanin” istehsal etməsi nəticəsində bu piqment bəzi sahələrdə toplanaraq qəhvəyi ləkələrin əmələ gəlməsinə gətirib çıxarır. Bundan əlavə, siqaret və stress də ləkə riskini artıran amillərdəndir.
Mütəxəssis qeyd edib ki, dəri üzərində yaranan hər bir ləkə günəşlə bağlı olmur. Hamiləlik dövründə yaranan çillər, sızanaq izləri və ya melazma kimi digər səbəblər də tünd ləkələrin əmələ gəlməsinə gətirib çıxara bilər. Buna görə də düzgün diaqnoz üçün dermatoloq məsləhəti mütləqdir.
Dr. Albayrak dəri ləkələrinin müalicəsində bir neçə üsuldan istifadə olunduğunu vurğulayıb: tibbi kremlər (retinol, C vitamini, arbutin), kimyəvi pilinq, mezoterapiya, eləcə də lazer müalicəsi. Xüsusilə Q-Switch lazer günəş ləkələri və çillərin aradan qaldırılmasında uğurlu nəticə verir.
Mütəxəssis xəbərdarlıq edib ki, müalicə prosesi qədər müalicədən sonrakı qulluq da çox vacibdir. Yüksək faktorlu günəşdən qoruyucuların istifadəsi, dərinin nəm balansının qorunması və həkim tərəfindən təyin olunan məhsulların mütəmadi tətbiqi ləkələrin təkrar yaranmasının qarşısını alır.
Albayrak əlavə edib ki, ləkə müalicəsinə başlamaq üçün ən uyğun vaxt payız və qış aylarıdır. Günəşin təsirinin daha az olduğu bu dövrdə müalicə daha təhlükəsiz və effektiv olur. O, həmçinin dəri ləkələrinin estetik baxımdan narahatlıq yarada biləcəyini, lakin düzgün yanaşma və dermatoloq nəzarəti ilə qalıcı nəticələrin əldə oluna biləcəyini vurğulayıb.
Tərcümə: Könül Oruc
