Mütəxəssislər mobil telefonla uzun müddət danışmağın gözlənilməz bir fəsadına diqqət çəkiblər: bu vərdiş üz sinirlərinə və çənə əzələlərinə mənfi təsir göstərə bilər.
E-saglam.az xəbər verir ki, xüsusilə cihazı qulağa dayayıb uzun müddət eyni vəziyyətdə saxlamaq üz sinirlərində gərginlik, ağrı və uyuşma ilə nəticələnə bilər.
Nevroloq Dr. Eda Karahan bildirir ki, telefonla saatlarla danışmaq, xüsusilə boyun və üz nahiyəsində gərginlik yaradır. “Bu vəziyyət zamanla sinirlərin sıxılmasına səbəb ola və "temporo-mandibulyar disfunksiya" deyilən bir çənə problemi ilə nəticələnə bilər,” – deyə həkim izah edir.
Bu halın əlamətləri arasında üzün bir tərəfində ağrı, çənəni açıb-bağlayarkən səslər, baş ağrıları və qulaq ətrafında gərginlik hissi yer alır. Uzun müddət telefonda danışanlarda bu simptomlara daha çox rast gəlinir.
Mütəxəssislər profilaktika üçün telefonla danışarkən cihazı qulağa sıxmaq əvəzinə “hands-free” (əlsiz) qurğulardan və ya qulaqcıqlardan istifadə etməyi tövsiyə edirlər. Həmçinin, danışma müddətini mümkün qədər qısa saxlamaq və fasilələrlə dəyişiklik etmək, sinir və əzələ gərginliyinin qarşısını ala bilər.
Beləliklə, mobil telefon rahatlıq gətirdiyi qədər, düzgün istifadə olunmazsa, səssiz bir təhlükəyə də çevrilə bilər.
Könül Oruc
