Aparılan araşdırmalar göstərir ki, gündə təxminən beş qoz yemək, tərkibindəki zəngin bioaktiv maddələr sayəsində kolon xərçəngi riskini azalda bilər. Xüsusilə xam və ya azca qovrulmuş halda istehlak olunan qozlar, balanslı pəhriz və sağlam həyat tərzi ilə birlikdə daha təsirli nəticə verir.
E-saglam.az-ın məlumatına görə, elm adamları qozun tərkibində omega-3 yağ turşuları, tokoferollar (E vitamini), β-sitosterol və polifenollar kimi güclü birləşmələr aşkar ediblər. Heyvan üzərində aparılan sınaqlarda qozun şiş hüceyrələrinin yayılmasını azaltdığı və xərçəng hüceyrələrini qidalandıran yeni damarların yaranmasının qarşısını aldığı müşahidə olunub. Bu təsir tək bir maddəyə deyil, qozdakı birləşmiş komponentlərin “qida sinergiyası”na əsaslanır.
Araşdırmalara görə, bütün qoz — tərkibindən ayrılmış omega-3 və ya vitaminlərlə müqayisədə — daha güclü qoruyucu təsir göstərir. Qozun təbii forması müxtəlif qida maddələrinin qarşılıqlı təsirini saxlayaraq xərçəng riskini daha effektiv şəkildə azaldır.
Mütəxəssislər qozu şəkər, duz və ya ağır emal olmadan, təbii şəkildə istehlak etməyi tövsiyə edir. Tədqiqatda gündə təxminən 56-60 qram (təxminən 5 ədəd) qozun faydalı olduğu göstərilib. Qozu meyvələr, yarpaqlı göyərtilər və tam taxıllarla birlikdə yemək, qoruyucu təsiri daha da artırır.
Qoz hər kəsi xərçəngdən tam qoruyacaq “möcüzəvi qida” deyil, lakin balanslı qidalanma, fiziki aktivlik və sağlam çəki ilə birlikdə, uzunmüddətli xərçəngdən qorunma planında güclü bir müttəfiq ola bilər.
Tərcümə: Könül Oruc
