Son illərdə bütün dünyada kişi sonsuzluğu sürətlə artan sağlamlıq problemlərindən birinə çevrilib.
E-saglam.az xəbər verir ki, urologiya mütəxəssisi Prof. Dr. Ramazan Yavuz Akman, sperma sayını və keyfiyyətini azaldan əsas səbəbləri və bu problemi azaltmaq üçün sınaqdan keçmiş 8 vacib tövsiyəni açıqlayıb.
Sperma keyfiyyətini azaldan 3 əsas səbəb
1. Ətraf mühit faktorları
Plastik qablaşdırmalarda və bəzi şəxsi qulluq məhsullarında rast gəlinən BPA və ftalatlar hormon sisteminə zərər vurur. Qurğuşun, kadmium, civə kimi ağır metallar və pestisidlər isə spermanın quruluşunu və hərəkətliliyini pozaraq DNT zədələnməsinə və sonsuzluğa səbəb ola bilər. Eyni zamanda hava çirkliliyi də oksidləşdirici stressi artıraraq sperma sağlamlığına mənfi təsir edir.
2. Həyat tərzi faktorları
Siqaret və spirt istifadəsi, yüksək şəkərli və emal olunmuş qidalarla qidalanma, piylənmə və hormon preparatlarının (testosteron əlavələri kimi) nəzarətsiz istifadəsi sperma keyfiyyətini və sayını azaldır.
3. Radiasiya və elektromaqnit təsiri
Telefon, Wi-Fi cihazları və digər texnoloji vasitələrdən gələn elektromaqnit dalğalar sperma DNT-sində zədələnməyə səbəb ola bilər.
Sperma sayını artıran və ata olmaq şansını yüksəldən 8 vacib tövsiyə
1. Aralıq dənizi tipli pəhriz
Meyvə, tərəvəz, tam taxıl və sağlam yağlarla zəngin pəhriz sperma parametrlərini yaxşılaşdırır.
2. Kimyəvi maddələrə məruz qalmanı azaldın
Plastik qablaşdırmalardan və sintetik maddələrdən uzaq durun. Orqanik qidaları seçin, qablaşdırılmış məhsullardan mümkün qədər çəkinin.
3. Sağlam çəki qoruyun
Piylənmə hormon balansını pozur, xaya temperaturunu artırır və sperma istehsalını zəiflədir.
4. Müntəzəm, amma orta intensivlikli idman edin
Fiziki aktivlik oksidləşdirici stressi azaldaraq sperma keyfiyyətini artırır. Amma həddindən artıq ağır idman, xüsusilə varikoselli kişilərdə zərərli ola bilər.
5. Siqareti və spirtli içkiləri tərgidin
Bu vərdişlər spermanın hərəkətliliyini və sayını azaldır. Tərgitmək reproduktiv sağlamlığı əhəmiyyətli dərəcədə yaxşılaşdırır.
6. Laptopu qucaqda istifadə etməyin
Laptopdan gələn istilik xaya temperaturunu artırır, bu da sperma istehsalına zərər verir. Həmişə masa səthində istifadə edin.
7. Yüksək temperaturdan uzaq olun
Sauna və buxar hamamı kimi isti mühitlər sperma istehsalını zəiflədə bilər.
8. Stresi idarə edin
Xroniki stress hormon səviyyəsini pozaraq sperma keyfiyyətinə mənfi təsir edir. Meditasiya, psixoloji dəstək və diqqətlilik texnikaları faydalı ola bilər.
Tərcümə: Könül Oruc
